給準大學生的十個不老土建議

為左好好迎接咁多位準大學生，刺青一班編輯集思廣益，呢期好努力回想返大學生涯既遺憾（唉…），綜合左十個不太老土的建議送比大家，衷心希望大家唔好再犯下我地既錯。

1. 無視大學五件事 大學迎新第一句就係問你知唔知咩係大學五件事（拍拖、讀書、住宿、上莊、兼職），但係大學生活何其繽紛有趣多元呢，所以唔好被五件事限制自己，路係由人行出來的，無人比你自己更有資格去判斷邊條路正唔正確，想做就做啦。

2. 寫封給自己的信 有時係到諗，如果開學第一日寫封信比一年後的自己，寫低而家既目標、願景，你心目中 Year 2 的你會係點，再同你新識既朋友一齊分享，一年後一齊拆開封信，個場面都應該會幾溫馨。（有人會試的話歡迎投稿）

3. 書中自有黃金屋 放假可能大家都唔鐘意睇書，但係大學忙，將來返工更加忙。熄左個芒，收埋部電話，每日認真讀睇返本與學科無關既書都唔係好難遮。如果唔係，學古人話齋：「人不讀書…照鏡則面目可憎，對人則語言無味。」

4. 學好點寫英文 Email 有啲野無人會教你，但係個個都以為你識。Email 個個都有用，但你又知唔知 CC 同 BCC 既分別呢？出黎做野會面對唔同龐大既官僚架構，而最偉大的工具就是電郵，你 Forward 我，我 CC 你，你 Reply 我，一封百幾字的簡單請求轉一轉就數以星期。摸清電郵世界的運作模式，學好點寫簡單客氣既英文 Email，做起事上黎都事半功倍。

5. 文書處理你要識 雖然入到大學各有專科，但其實科科都要用 Office 架啫，報告、簡報、做 Project。有調查話九成 Office 既用家平日只用一成功能，學好 Word, Excel 和 Power Point，做 Project 都多啲人搵你同組。

6. 伏中自有黃金屋 除左書之外，伏其實都係一個寶庫。上期我地探討伏的真締，得出既結論：其實伏也是一種歷練，「受過傷先知道要堅強」，聽到伏 Course，爛 Grade 唔好掉頭走，人地既伏可能你當係寶，自己經歷過先係最寶貴的經驗，學識 Say Yes 先唔會錯過正野。

7. 機會是給有心人 好多人都話其實大學入面機會就大把，係睇你有無心搵。雖然平日會收好多 Mass Email，但其實當中都有好多滄海遺珠，實習、講座、工作坊、交流咩都有，勤力啲 Check Email，得閒睇下學校網站、校內張貼的單張和海報。機會多不勝數，世上無難事，只怕有心人。

8. 記唔到就抄底佢 講起申請野，記 Deadline 也算係常識吧。就算功課考試貸款面試呢啲咁重要既野，唔知點解身邊既人好似都係唔太在乎，遲交遲到都無咩所謂。搵本野，用部電話記低佢有幾難呢？讀到大學仲係成日唔記得呢樣唔記得個樣，有時諗返都幾低 B。

9. 潮人潮語講少句 你以為大學用語很潮嗎？一個伏字，拒絕左太多東西，一個 Chur 字，取代締左太多感受，拋開這些終結對話專用的俗語，完完整整說出自己的感受和想法，才是一件賞心樂事。不要清高等人約，得閒便找知己好友一齊 High Tea、Happy Hour，通常也有意外收獲（主編言：黃同學神人也）。

10. 老土的最後一句 對唔住，最好既建議其實都係老土既建議，最後一句都係忍唔住要講個句：唔好盲目跟人意見，所有規矩同傳統都要諗下有無守既必要，包括某某雜誌的所謂建議（笑）。

話比你知：過完迎新你再睇呢篇你會發現自己又唔記得呢句，不過，你同我其實都只不過係善忘既動物，忘記了沒有甚麼大不了，只係花多幾倍既時間走同一條路，走得開心精采又有咩所謂呢？

（原載於刺青雜誌 Punch Magazine)